Ажабо! Ўшлик етмиш икки ёшли Саидфозил Муҳаммедов жаҳон чемпиони бўлди
Ҳамюртимиз Россия пойтахтида оғир атлетика бўйича ўтган мусобақалардан олтин медал билан қайтди.
Москва шаҳрида, 2023 йилнинг 16-17 декабрь кунлари ўтказилган оғир атлетиканинг пауэрлифтинг тури бўйича катта ёшдагилар ўртасида жаҳон чемпионатида 72 ёшли ҳамшаҳримиз Саидфозил Муҳаммедов жаҳон чемпионлигини қўлга киритди.
Бундан бироз аввал қаҳрамонимиз катталар ўртасида 90 кг вазн тоифасида ўтказилган баҳсларда мутлоқ Осиё чемпиони ҳамда мутлоқ Европа чемпиони бўлган. Бу кўрсаткичлар фахрий, лекин қатордаги спортчимизга Америка Қўшма Штатларига сари йўлланма олиш учун қимматли рейтинг очколарини ҳам тақдим этди.
Бугун бизнинг меҳмонимиз – жуда камтарин инсон, 72 ёшли жаҳон чемпиони Саидфозил Муҳаммедов.
– Ассалому алайкум, Саидфозил ака, спортга қизиқишингиз қачондан бошланган? Нега айнан оғир атлетикани танладингиз?
– Бисмиллаҳир роҳманир роҳим. Мен спортдаги фаолиятимни 1965 йилда бошлаганман. Шаҳримиздаги болалар спорт мактабига оғир атлетикага борадиган бир қариндошим бўлган. Ўша мени қизиқтириб, бу спорт турига олиб кирган. Машғулотлар давомида қизиқишим янада ортди. 1970 йил терма жамоага қабул қилиндим. Бу орада ўзимдан катта атлетикачилар билан машғулотларга қатнашганим менинг ўсишимга ёрдам берган. Машғулотлар давомида уларга ҳавасим ошиб, янада кўпроқ ҳаракат қилишим кераклигини тушуниб етдим.
– Устозларингиз ҳақида ҳам тўхталиб ўтсангиз…
– Биринчи мураббийим Сергей Салтикович бўлган. Кейинчалик Дилшод Юлдашев, Рустам Қосимович деган устозларнинг қўлида тарбия олдим. Спортчи эришган муваффақиятларида биринчи мураббийнинг ўрни катта бўлади.
– Спортнинг пауэрлифтинг тури билан ҳам шуғулланар экансиз. Шу ҳақда айтиб берсангиз…
– Бу спорт турига 1990 йиллари ҳавас қилиб кириб келганман. Дастлаб Қирғизистон Республикаси чемпиони бўлдим. Кейин қаттиқ тайёргарлик кўрганим натижасида Осиё чемпионатида биринчи ўринни олдим. Кейинчалик Европа чемпионатида Европа чемпиони бўлдим. Ва ниҳоят, яқинда Россиянинг Москва шаҳрида ўтказилган катталар ўртасидаги жаҳон чемпионатида 100 кг вазн тоифасида умумий 135 кг натижа билан биринчи ўринни олиб, олтин медал билан тақдирландим.
Бизнинг досъе: Саидфозил Муҳаммедов. 1952 йил 20 октябрда Ўш шаҳрининг Шаҳидтепа маҳалласида туғилган. 1969 йилда шаҳардаги Тельмон номли 15-сон ўрта мактабини битирган.
Пауэрлифтинг (инглизча power — „куч, қувват“ ва lifting — „кўтариш“ сўзларидан олинган) — катта куч талаб этиладиган спорт тури бўлиб, уч кураш кучи деб ҳам юритилади.
Пауэрлифтинг уч машқни ўз ичига олади: штангани орқага, аниқроғи, куракнинг юқори қисмига олиб ўтириб-туриш, горизонтал курсида ётган ҳолатда тошни кўтариш ва уни ўрнидан қўзғатиш — бу машқларнинг жами спортчининг умумий малакасини билдиради. Мен ётган ҳолатда горизонтал курсида тошни кўтаришда ғолиб бўлдим.
– Оғир атлетикадан қайси давлат вакилларини ўзингизга муносиб рақиб деб айта оласиз?
– Россия, Қозоғистон давлатларидан келган атлетларни кучли деб айтишим мумкин. Буни уларнинг халқаро мусобақаларда қайд этаётган натижаларидан ҳам билиб олиш қийин эмас.
– Сиз учун штангани силтаб кўтариш қулайми ёки даст кўтариш?
– Машғулотларда иккала машқни ҳам яхши бажара оламан. Иккиси ҳам менга яхши. Лекин, силтаб кўтаришни бажариш менга қулайроқ туюлади. Силтаб кўтариш машқида қийинчиликсиз яхши натижа кўрсата оламан.
– Бўш вақтларингизда нималар билан шуғулланасиз?
– Бўш пайтларимда кўпинча Қуръон ўқийман. Кўп китоб ўқийман. Қўлимдан электриклик келади. Шунақа нарсалар билан шуғулланаман.
– Сиз кўп ғалабага эришган экансиз. Улардан энг унутилмас, сиз учун энг қадрлиси қайси?
–- Менинг фаолиятимдаги энг унутилмас ғалаба боя айтганим, Москва шаҳрида 16-17 декабрь кунлари ўтказилган жаҳон чемпионатида чемпионликни қўлга киритганим бўлди.
– Оғир атлетикада қандай ҳолатларда оғир жароҳат олиши мумкин?
– Мен спортга 13 ёшимдан кирганман. Ҳозирги кунгача, – мана 72 га кирдим, – бирор бир жароҳат олмаганман. Бундай ҳолатлар кўпинча машғулотларга тайёр бўлмай бориш оқибатида юзага келади. Бу эса спортчини кутилмаганда ёмон аҳволга тушириб қўяди. Бундан ташқари, дам олмасдан борсангиз, ланж, чарчаган ҳолатда машқни бажаришни бошлаш ҳам жароҳат олишга олиб келади. Оғир атлетикада асосан бел, тизза кўп жароҳат олади.
– Эндиги режаларингиз қандай?
– Келажакдаги ниятим – яна икки марта жаҳон чемпиони бўлиб, Аллоҳ буюрса, Америка Қўшма Штатларида ўтказиладиган мусобақаларда давлатимиз байроғини кўтариш. Шунга ҳаракат қиламан.
– Мароқли ва мазмунли суҳбатингиз учун ташаккур!
– Раҳмат, саломат бўлинг.
Оқбура, Ўш.
Одилжон Дадажонов суҳбатлашди.
Таҳририятдан: Биз ўзининг натижали ҳаракатлари, эришаётган ютуқлари билан анча-мунча ёшларнинг оғзини очиб қўядиган, ҳаётда кўпчилигимизга намуна бўла оладиган ҳамюртимиз Саидфозил Муҳаммедовга кўзлаган ниятларига етишини тилаймиз. Чемпионимизнинг мазмунли умрига ва ризқига барака тилаймиз.
Биз Сиз билан фахрланамиз!
